Tyrkia
|
|
Tyrkia, official-ye id Tyrk Jumhuriat (tyrk : Türkiye Cumhuriyet) est un parlamentar jumhuriat in Eurasia, khaliban lyehgend in West Asia, plus sieno smulker portion os Eust Thrace in Sudeust Europe. Tyrkia leizdent oct lands : Suria ed Irak sudi; Iran, Armenia ed id Aserbaydjani exclave Nakhchivan eusti; Kartvelia nordeusti, Bulgaria nordwesti, ed Hellad westi. Id Kyehrsen Mar lyehct norder quem Tyrkia, id Mediomar suder ed id Agayos wester. Ia Bosphor, Marmara ed Dardanelles (qua comskeipe ia Tyrka Stretts) bo separe Thrace ud Anadolu ed Europe ud Asia. Tyrkias tolp inter ta dwo continents id beuwt un land samt geostrategic ahammiyat.
Sekwent id Tyrk statistic institut, id population ios landios mikdier 74,7 millions leuden in 2011, samt takriban tri quardels bayna ti gwivend in urbs ed citads. Id official bahsa ios land est Tyrk, quod est id materbahsa os 85,54 % ios population. Id nagor Tyrkias est Ankara, in Central Anadolu. Id tyrk lira est id official rawaj om bo Tyrkia ed ios Nord Cypros Tyrk Jumhuriat, senter land esend recogniht ka Stat ab neid alyo Stat apart Tyrkia.
Id kurdo probleme[]
Id conflict opponend id tyrk armee ei Orbaterpartise os Kurdistan (PKK) hieb nicen circa 35 000 anghens ex 1985 do 1999 ed desplacen dwo millions qui se kowpeer in ia barrios om Istanbul, Ankara... 2000 intellectuals buir eti assassint ab nehcsquadrons vohrbhta bayna ia extreme-dexter milieus. Pos unum unilateral cessetpiurn ios PKK decreten in 1999 ab iom karcerbohnden Abdullah Öcalan, pos id recognition om certain linguistic ed cultural rects, ia drehdens contra id tyrk armee hieb stopen. Rinkiepeer in 2004. Accusend i Kurds Iraks ob enderbringhes 3500 yeudmens ios PKK ed im dadwe armes ed explosives, ia tyrk autoritats hieb duct ab December 2007 plur air operations in Iraki Kurdistan. In 2012, ob ia stehmens dadwt hois ab Baschar Al-Assad im Suri Kurds ed, ciois, ab Tyrkia im suri rebells, id conflict hat rinkapt ed se hat internationaliset. Ia haines inter Kurds ed Tyrks, dalg ud bihe sut, hatta incurreihient Tyrkia implosionsrisks.