FANDOM


Tarjems ab Steve Rice

ID PREST EPISTEL GENERAL OS IOHANNES

Capitel 1
1 Quo eet ud id inkap, quo ieuram, quo visam med noster okwi, quo spohcam ed noster hands toucheer dayir id Werd os gwit 2 (ed id gwit hat prohpt, ed habmos vis ed weitwoddmos ed mehldmos vos id abadic gwit, quod eet bi iom Pater ed nos hat prohpt)--3 quo visam ed ieuram, to mehldmos vos, kay yuschi habte communion con nos. Ed noster communion est con iom Pater ed con Eys Son Jesus Christ. 4 Ed scribmos to, kay noster joy est complete.
5 Ed to est id message quod ieuram ud Iom ed mehldmos vos, od Div est luce, ed neid temos est in Iom. 6 Sei saygmos od habmos communion con iom, ed ghangmos in id temos, leughmos, ed ne kwehrmos id druve; 7 bet sei ghangmos in id luce, kam Is est in id luce, habmos communion con mutu, ed id sehrg os Jesus, Eys Son, pureiht nos ud quantum synt. 8 Sei saygmos, od ne habmos synt, dusagmos nos, ed id druve ne est in nos. 9 Sei confettmos noster synts, Is est derv ed ieust kay indulges nos noster synts ed purihes nos ud quantum [au: cada] agos. 10 Sei saygmos, od ne habmos synten, kalmos Iom un leugher, ed Eys werd ne est in nos.
Capitel 2
1 Mien kyar purts, scribo to vos, kay yu ne syntte. Ed sei quelgvonc synt, habmos un parakleto bi iom Pater, Jesus Christ iom ieusto; 2 ed is est adonen de noster synts, ed ne tik de ta noster, sontern yaschi de ta ios hol mund. 3 Ed med to woidam, od gnohmos iom: sei obedeihms eys commandements. 4 Quel sayct: Io gnohm iom, ed ne obedeiht eys commandements, tel est leugher, ed id druve ne est in el; 5 bet quelgvonc, quel obedeiht eys werd, druve-ye id liubh os Div est perfectiht in el. Med to woidam od smos in iom: 6 quel sayct od el mant in iom, tel swo dehlct [ithan] ghange, kam is ghieng.
7 Liubhti, ne scribo vos un nov commandement, sontern un veut commandement, quod yu hiebat ud id inkap; id veut commandement est id werd, quod ieurat. 8 Lakin scribo vos un nov commandement, quo est ver in iom ed in vos; ar id temos enderleitt, ed id ver luce ja leuct. 9 Quel sayct od el est in id luce, ed haint sien brater, tel est dar in id temos. 10 Quel lieubht sien brater, tel mant in id luce, ed in el [au: iom, au: id] est neid offensor. 11 Bet quel haint sien brater, tel est in id temos, ed eiht in id temos, ed ne woidit quetro el eiht, ar id temos blinsit els okwi.
12 Scribo vos, kyar purts, ar ia synts vos sont indulct ob eys nam. 13 Scribo vos, paters, ar gnohte iom qui est ud id inkap. Scribo vos, yuni, ar yu vicat iom khiter. 14 Scripsim vos, purts, ar gnohte iom Pater. Scripsim vos, paters, ar gnohte tel quel est ud id inkap. Scripsim vos, yuni, ar yu ste nert, ed id werd os Div mant in vos, ed yu vicat iom khiter. 
15 Mae lieubhte id mund, ni ia jects qua sont in id mund. Sei quelgvonc lieubht id mund, id liubh ios Pater ne est in el. 16 Ar quantum, quod est in id mund, id wehnos ios krew ed id wehnos iom okwi ed id schekhi ios gwit, ne est ud iom Pater sontern ud id mund. 17 Id mund enderleitt ed ids wehnos; bet quel kwehrt id vol os Div mant pro aiwo.
18 Purts, ja est id senst hor; ed kam ieurat, od [-is] antichrist gwehmt, hatta nun kathire antichrists ja appareihnt; ob to woidam, od est id senst hor. 19 Gwohmeer ex bayna nos, bet ne eent ex nos; ar sei esient ex nos, habient mant con nos; bet i gwohmeer, kay i kwehrent aschikar, od i quanti ne sont ex nos. 20 Ed yu habte ehngwen ud iom Sainto, ed woidat quantens [alya kawus: gnohte quanta]. 21 Scripsim vos ne ob yu ne woidat id druve, sontern ob woidat id, ed ob neid leugh est ex id druve. 22 Quel est el leugher, sei ne tel quel neget, od Jesus est is Christ? Tel est el antichrist, quel neget iom Pater ed iom Son. 23 Cadanghen, quel neget iom Son, ne hat iom Pater; tel quel confett iom Son, hat yaschi iom Pater. 24 Mantu schowi in vos to, quo ieurat ud id inkap. Sei to, quo ieurat ud id inkap, mant in vos, yuschi mansiete in iom Son ed in iom Pater. 25 Ed tod est id promiss, quod is promissit nos: id abadic gwit. 
26 Ta scripsim vos de ti, qui dusagent vos. 27 Bet yu--id ehngwen, quod yu primat ud iom, mant in vos, ed yu ne naudhte od semanghen doct vos; bet kam eys ehngwen doct vos de quantum ed est ver ed ne est leugh, ed kam id docit vos, mante [au: yu mante] in iom. 
28 Ed nun, kyar purts, mante in iom; kay, sei is siet apparihes, sessiems confident, ed ne habsiems aygves ant iom ye eys arriven. 29 Sei woidat, od is est ieust, woidat, od yaschi cadanghen, quel kwehrt id ieustum, ex iom gnaht.
Capitel 3
1 Vidte, qualgo liubh is Pater dahsit nos, kay smos kalt purts os Div--ed smos solg! Ob to id mund ne gnoht nos, ar id ne gnohsit Iom. 2 Liubhti, nun smos purts os Div, ed dar ne hat appariht, quo sessiems. Woidam od sei is [au maghsies: to] siet apparihes, sessiems kam iom; ar vidsiems iom, kam is est. 3 Ed cadanghen, quel hat tod speh dayir iom, pureiht se ithan, kam isswo est pur. 
4 Cadanghen, quel kwehrt synt, kwehrt aunieusia; ed synt est aunieusia. 5 Ed woidat, od is apparihsit, kay schiawkiene synts; ed synt ne est in iom. 6 Cadanghen, quel mant in iom, ne synt; cada synter neter visit iom, ni gnoht iom. 7 Kyar purts, nimen dusact vos; quel kwehrt id ieustum, tel est ieust ithan, kam is est ieust; 8 quel kwehrt synt, tel est ex iom diabel; ar is diabel synt ud id inkap. Pro to is Son os Div apparihsit, kay is diskwehrt ia wehrgs ios diabel. 9 Cadanghen quel gnaht ex Div, ne kwehrt synt, ar eys semen mant in el; ed el ne ghehdt synte, ar el gnahsit ex Div. 10 Med to appareihnt i purts os Div, ed i purts ios diabel: cadanghen, quel ne kwehrt id ieustum, ne est ud Div, ni tel quel ne lieubht sien brater. 
11 Ar to est id message quod ieurat ud id inkap: od lieubhmos mutu; 12 ne kam Cain qui eet ud iom khiter ed qui zabiekh sien brater. Ed ob quod is nixit iom? Ob eys wehrgs eent khiter, ed ta os eys brater eent ieust. 13 Mae daumte, braters, sei id mund haint vos. 14 Woidam, od ja habmos passet ex daunet do gwit, ar lieubhmos iens braters. Quel ne lieubht, tel mant in daunet. 15 Cadanghen, quel haint sien brater, est maurdher; ed woidat, od cada maurdher ne hat abadic gwit manend in el [au: Iom/Div]. 16 Med to gnohmos liubh: ar is sacrificit sien gwit ob nos; ed wey dehlgmos sacrifie noster gwit ob iens braters. 17 Bet sei semanghen hat id parwarisch ios mund ed vidt sien mukhtaj brater ed cludt sien afu protiev el, quosmed id liubh os Div mant in el? 18 Kyar purts, smad liubhes, ne med werd ni sekwent dingv, sontern med wehrg ed druve. 
19 Med to siems woide, od smos ex id druve, ed rassurems noster kerd ant Iom 20 ar, sei noster kerd nos aunstehmt, Div est meger quem noster kerd, ed woidit quantum. 21 Liubhti, sei [noster] kerd ne aunstehmt [-nos], smos confident ant Div; 22 ed quodkwe, quod beudmos, id dakmos ud Iom, ar obedeihms Eys commandements, ed kwehrmos quo plaist Iom. 23 Ed to est Eys commandement, od credeihms ye id nam os Eys Son, Jesus Christ, ed lieubhmos mutu kam Is nos commandit. 24 Ed quel obedeiht Eys commandements, el in iom mant, ed Is in el. Ed med to woidam, od Is mant in nos: med iom Spirit, quom Is dahsit nos.
Capitel 4
1 Liubhti, mae credeihte cada spirit, sontern spreufte i spirits, kweter i sont ex Div; ar kathire fals prophets sielgeer do id mund. 2 Med to yu recogneihte iom Spirit os Div: cada spirit, quel confett, od Jesus Christ gwohm in id krew, est ex Div; 3 ed cada spirit, quel ne confett Jesus, ne est ex Div; ed tel est el spirit ios antichrist, de quel ieurat, od el gwehmt; ed nun id ja est in id mund. 4 Kyar purts, yu ste ex Div, ed vicat i; ar meger est tel quel est in vos, quem tel quel est in id mund. 5 I sont ex id mund; ob to i bahnt sekwent id mund, ed id mund kleut i. 6 Wey smos ex Div; quel gnoht Div, tel kleut nos; quel ne est ex Div, tel ne kleut nos. Med tod recogneihms el spirit os druve, ed el spirit os dusagen.
7 Liubhti, smad liubhes mutu; ar id liubh est ex Div; ed cadanghen, quel lieubht, gnaht ex Div ed gnoht Div. 8 Quel ne lieubht, tel ne gnoht Div, ar Div est liubh. 9 Med to id liubh os Div appareiht in nos: od Div yisit Sien unique Son do id mund, kay gwivmos med iom. 10 Ed to est id liubh, ne od liubham Div, bet od Is liubhit nos, ed yisit Sien Son kam adonen ob noster synts. 11 Liubhti, sei Div ithan liubhit nos, weyschi dehlgmos liubhes mutu. 12 Nimen aiwo visit Div; sei lieubhmos mutu, Div mant in nos, ed Eys liubh est perfectiht in nos. 
13 Med to woidam, od manmos in Iom, ed Is in nos; ar ex Sien Spirit Is dahsit nos. 14 Ed hams vis ed weitwoddmos, od is Pater yisit iom Son kay ses is Salvor ios mund. 15 Quelgvonc, quel confett, od Jesus est is Son os Div--Div mant in el, ed el in Div. 16 Ed gnohms ed credeihms ye id liubh, quod Div hat pro nos. 
Div est liubh; ed quel mant in id liubh, tel mant in Div, ed Div mant in el. 17 Med to liubh hat esen perfectiht bi nos: kay habsiems confidence ye id dien os judcement; ar kam is est, solg weyschi smos in tod mund. 18 Baysa ne est in liubh; bet perfect liubh xeubht baysa extro, ar baysa concernt kyasen; ed quel bayt ne est perfectiht in liubh. 19 Lieubhmos, ar Is prest-ye nos liubhit. 20 Sei semanghen sayct: Lieubho Div, ed haint sien brater--tel est leugher; ar quel ne lieubht sien brater, quel el hat vis, tel khact liubhes Div, quom el ne hat vis. 21 Ed tod commandement habmos ud Iom: quel lieubht Div, tel lieubhtu yaschi sien brater.
Capitel 5
1 Cadanghen, quel credeiht, od Jesus est is Christ, gnahsit ex Div; ed cadanghen, quel lieubht iom Gehnihtor, lieubht [yaschi] i gehnihts ex Iom. 2 Med to woidam, od lieubhmos i purts os Div: quan lieubhmos Div ed kwehrmos [alya kawus: obedeihms] Eys commandements. 3 Ar to est id liubh pro Div: kay obedeihms Eys commandements; ed Eys commandements ne sont muschkil. 4 Ar quantum, quod ex Div gnahsit, vinct id mund; ed to est id victoria quod vinct id mund: noster fid. 5 [Ed] quel est el quel vinct id mund, sei ne tel quel credeiht, od Jesus est is Son os Div? 
6 So est is gwehmend med wed ed sehrg, Jesus Christ; ne med id wed tik, sontern med id wed ed med id sehrg. Ed is Spirit est is schahide, ar is Spirit est id druve. 7 Ar tri sont i schahides [alya kawus: ies schahides in id warwn: Is Pater, is Werd ed is Saint Spirit, ed toy tri sont oin.] 8 [-Ed tri sont i schahides in id ardh]: is Spirit, ed id wed, ed id sehrg; ed i tri in oin samstehment. 9 Sei acceptems id schahidia im mensci, meger est id schahidia os Div; ar to est id schahidia os Div: od Is schahidit de Sien Son. 10 Quel credeiht ye iom Son os Div, tel hat id schahidia in se [alya kawus: iom]; quel ne credeiht Div, tel kiel Iom un leugher, ob el ne credihsit id schahidia, quod Div schahidit de Sien Son. 11 Ed to est id schahidia: od Div dahsit nos id abadic gwit; ed tod gwit est in Eys Son. 12 Quel hat iom Son, tel hat id gwit; quel ne hat iom Son os Div, tel id gwit ne hat.
13 Ta scripsim vos, kay yu woidat, od yu habte abadic gwit--vos qui credeihnt ye id nam ios Son os Div. 14 Ed to est id confidence, quod habmos ant Iom: od sei beudmos semquod sekwent eys vol, Is nos kleut; 15 ed sei woidam, od Is nos kleut de semquod, quod beudmos, woidam, od habmos ia prehgens, qua beudmos ud Iom. 
16 Sei semanghen vidt sien brater committe un synt quod nel-ye duct do daunet, el prehctu, ed Is dahsiet gwit tal, quel committe un synt quod nel-ye duct do daunet. Est daunost synt; ne de to saygo kay el prehct. 17 Cada agos est synt; ed est synt ne do daunet.
18 Woidam, od cadanghen quel gnahsit ex Div ne synt; bet is Gehniht ex Div behrct el [alya kawus: el gehniht ex Div behrct se], ed is khiter ne touchet el. 19 Woidam, od smos ex Div, ed id hol mund lyehct in iom khiter. 20 Ed woidam, od is Son os Div gwohmit ed dahsit nos preten, kay gnohms id Druve; ed smos in id Druve, in Eys Son, Jesus Christ. So est is ver Div, ed id abadic gwit. 21 Kyar purts, behrcte vos ud idols.
ID SECOND EPISTEL GENERAL OS IOHANNES
1 Is Awo ay chusen potnia [au maghsies: Kyria] ed aysims purts, qui ego lieubho in id druve; ed ne ego mon, sontern quanti qui gnohnt id druve; 2 ob id druve manend in nos, ed quod sessiet bi nos pro aiwo: 3 Grace, afu, pace, sessient bi nos ud Div, iom Pater, ed ud Jesus Christ, iom Son ios Pater, in druve ed liubh.
4 Ho meg joy ob trehvus sems im purts ghangend in id druve kam primam commandement ud iom Pater. 5 Ed nun prehgo vos, potnia, ne kam scribend vos un nov commandement, sontern tod quod xeihneumos pon id inkap, od lieubhmos mutu. 6 Ed to est id liubh: kay ghangmos sekwent Eys commandements. Tod est id commandement, quod ieurat ud id inkap, kay yu ghancte in id. 7 Ar maung dusagends sielgeer do id mund, qui ne confettent Jesus Christ gwehmend in krew. Tel est el dusagend ed el antichrist. 8 Behrcte vos, kay yu ne leuste tod, pro quod orbatmos [alya kawus: yu orbatte], bet kay yu dacte un complete mizdo. 9 Cadanghen, quel proleitt ed ne mant in id doctrine os Christ, ne hat Div; quel mant in id doctrine, tel hat ed iom Pater ed iom Son. 10 Sei semanghen gwehmt ad vos ed ne bringht tod doctrine, mae preimte el do id dom, ed mae saycte salut al; 11 ar quel sayct salut al, tel smyehrt els khiter wehrgs.
12 Habend maung jects scriptu vos, ne volim scribe med papier ed tinto; bet spehm gwahe bi vos ed bahe face vos, kay noster [alya kawus: voster] joy est plen. 13 Salutent vos i purts as voster swes, iam chusen.
ID TRIT EPISTEL GENERAL OS IOHANNES
1 Is Awo ad Gayus iom liubhto, quom lieubho in id druve.
2 Liubhte, volo de quanta od mwaniens ed es saun, kam yaschi mwanient tien spirit. 3 Ar baygh ghiewdim, quan braters gwohmeer ed schahideer id druve de tien _gwit_, kam ghancs in id druve. 4 Ne ho baygher joy, quem aure od mien purts ghangent in id druve.
5 Liubhte, tu kwehrs derv-ye to, quo kwehrs pro iens braters ed to pro tarniens, 6 qui schahideer tien liubh ant id assemblee; suakwehrsies yeisend-ye i perodh olgh-ye ant Div, 7 ar ob id Nam i sielgeer, dakend neid ud i pagans. 8 Dehlgmos schowi assiste solgens, kay wehrgmos comsamen in id druve.
9 Scripsim _quodgvonc_ ei assemblee; bet Diotrephes, qui kamt ses ir chef, ne recogneiht nos. 10 Ob to, sei gwehmsiem, mehmeihsiem _iens_ eys wehrgs, qua is kwehrt, calumnyend-ye nos med khiter werds; ed, ne contentend-ye se med to, is hatta ne preimt iens braters ed bant tim, qui volent primes iens, ed xeubht ti ex id assemblee. 
11 Liubhte, imites ne quo est khiter, sontern quo est sell. Quel kwehrt sell jects est ex Div; quel kwehrt khiter jects ne hat vis Div. 12 Demetrius hat un sell schahidia ud quantens ed ud idswo druve. Weyschi weitwoddmos _de iom_; ed tu woidst od noster schahidia est ver.
13 Hiebim maung jects scriptu tib; bet ne volo scribe tib med tinto ed kalem; 14 bet speho mox vide te, ed bahsiems voc con voc. 15 Pace tib. I prients salutent te. Salute i prients nam-ye.